Volve «Inside the Lab», as xornadas de demostración tecnolóxica do CiTIUS

O CiTIUS organiza por cuarto ano consecutivo a xornada de portas abertas ‘Inside the Lab’, un encontro onde empresas e sector público poderán coñecer últimos avances de investigación desenvolvidos no centro, así como as súas posibles aplicacións en diferentes sectores.


O vindeiro venres 6 de xullo as instalacións do CiTIUS acollerán a xornada Inside the lab 4, unha nova edición do encontro global co mundo da empresa e as administracións públicas que cada verán regresa ao centro. Tralo éxito de participación de edicións anteriories (preto de cen asistentes e 60 organizacións en 2017), os científicos confían en atraer de novo ao público máis especializado para seren quen de trasladarlle as vantaxes competitivas dos seus resultados de investigación.

Durante toda a mañá, os asistentes terán a oportunidade de descubrir unhas tecnoloxías que contan xa cun grao óptimo de innovación e madurez, o que as converte en candidatas ideais para ser transferidas. Entre as 10:00 e as 14:00, distintos puntos de información repartidos polo centro destacarán algunhas das múltiples aplicacións coas que contan estes sistemas, tanto a nivel social como industrial.

Á xornada asistirán tamén responsables das dúas spin-offs creadas por investigadores do CiTIUS: Situm, que centra a súa actividade nas tecnoloxías de xeoposicionamiento en interiores, e Imagames, orientada ao desenvolvemento de solucións de gamificación en diversos dominios como a formación de empregados, as técnicas de e-learning (aprendizaxe virtual), ou a mercadotecnia dixital.

As persoas interesadas en participar neste encontro deberán cubrir antes do xoves 5 de xullo o formulario de inscrición na web oficial do evento.

 Facebooktwittergoogle_pluslinkedinmail

Here's your chance to leave a comment!